மும்பை கேம்பகோலா வளாகத்தில் சட்டவிரோதமாக கட்டப்பட்டிருந்த குடியிருப்புகளை அகற்ற விடாமல் குடியிருப்பில் வசிக்கும் பெண்கள் தடுத்ததால் பரபரப்பு ஏற்பட்டது.மும்பை கேம்பகோலா வளாகத்தில் 6 அடுக்குமாடி கட்டுவதற்கு மட்டுமே அனுமதி வாங்கிவிட்டு 20 மாடிகள் வரை வானளாவிய கட்டிடங்கள் கட்டப்பட்டுள்ளன. அதில் 102 வீடுகள் சட்டவிரோதமாக அமைந்துள்ளன. எனவே, அதில் வசிப்பவர்களை அப்புறப்படுத்திவிட்டு, அந்த பிளாட்டுகளை இடிக்க நகராட்சி முடிவு செய்தது. இதனை எதிர்த்து குடியிருப்பு வாசிகள் தொடர்ந்த மனுவை சுப்ரீம் கோர்ட் தள்ளுபடி செய்தது.
இதையடுத்து, இம்மாதம் 17-ம் தேதி கட்டிடத்தை இடிக்கும் பணியை ஆரம்பிக்க திட்டமிடப்பட்டது. ஆனால், அந்த குடியிருப்பில் வசித்து வந்த இரண்டு பேர் இறந்ததையடுத்து அப்பணியை இன்று தொடங்க முடிவு செய்தனர்.
அதன்படி, இன்று கேம்பகோலா வளாகத்திற்குச் சென்ற அதிகாரிகள் முதற்கட்டமாக அந்த வீடுகளுக்கு செல்லும் குடிநீர் இணைப்பு, மின்சாரம், பைப் எரிவாயு சப்ளை ஆகியவற்றை துண்டிக்க முயன்றனர். ஆனால், இதற்கு எதிர்ப்பு தெரிவித்த குடியிருப்பு வாசிகள் அரண் போல் நின்று பணியை தடுத்தனர். இதில் முதல் வரிசையில் பெண்கள் அணி வகுத்து நின்று போலீசார் மற்றும் அதிகாரிகளுடன் மோத தயாராக இருந்தனர். இதனால் திடீர் பரபரப்பு ஏற்பட்டது.
இதற்கிடையே, கேம்பகோலா குடியிருப்பு வாசிகளை சந்தித்த மத்திய நகர்ப்புற மேம்பாட்டுத் துறை மந்திரி வெங்கையா நாயுடு அவர்களுடன் சமரசப் பேச்சுவார்த்தை நடத்தினார். இந்த விவகாரம் நீதிமன்றத்தில் இருப்பதால் மத்திய அரசு இதில் தலையிட முடியாது என்று அவர் தெரிவித்தார்.
மக்களின் கடும் எதிர்ப்புக்கிடையே அந்த வளாகத்திற்கு செல்லும் குடிநீர் மற்றும் மின்சார இணைப்பினை மாநகராட்சி இன்று துண்டித்தனர்.
0 comments
Post a Comment