ஈராக்கில் சிக்கி தவிக்கும் தஞ்சை டிரைவர்: பத்திரமாக மீட்க உறவினர்கள் வலியுறுத்தல்

ஈராக்கில் தஞ்சையை சேர்ந்த டிரைவர் சிக்கி தவிக்கிறார். அவரை இந்தியா கொண்டு வர நடவடிக்கை எடுக்க வேண்டும் என மனைவி மற்றும் உறவினர்கள் கண்ணீருடன் வேண்டுகோள் விடுத்துள்ளனர்.

ஈராக்கில் ராணுவத்தினருக்கும், தீவிரவாதிகளுக்கும் மோதல் நடந்து வருவதால் உள்நாட்டு போர் மூண்டுள்ளது. ஈராக்கில் ஆயிரக்கணக்கான இந்திய தொழிலாளர்கள் பணிபுரிந்து வருகிறார்கள்.

இதில் தீவிரவாதிகள் கட்டுப்பாட்டில் உள்ள மொசூல் நகரில் 40 இந்திய தொழிலாளர்களும், திக்ரித் நகரில் 46 இந்திய நர்சுகளும் சிக்கி உள்ளனர்.

ஈராக்கில் உள்நாட்டு போர் மூண்டுள்ளதால் ஏராளமான இந்தியர்கள் பாதிக்கப்பட்டுள்ளனர். அவர்கள் இந்தியா வர முடியாமல் தவித்து வருகிறார்கள். அவர்களில் தஞ்சை மாவட்டத்தை சேர்ந்த ஒருவரும் ஆவர்.

தஞ்சையை அடுத்துள்ள மைக்கேல் பட்டி செபஸ்தியார் மேடை தெருவை சேர்ந்தவர் சலீம் அபுபக்கர்(38). இவர் பூதலூர் ஒன்றிய அ.தி.மு.க. இளைஞர் மற்றும் இளம் பெண்கள் பாறை துணை செயலாளராகவும் இருந்து வருகிறார்.

இவர் கடந்த 4 மாதத்துக்கு முன் மும்பையை சேர்ந்த தனியார் கம்பெனி மூலம் ஈராக் சென்றார். அங்கு ஒரிஸ்லான் நகரில் கிரேன் ஆபரேட்டராக வேலை பார்த்து வருகிறார்.

இவருக்கு சபிதா பேகம்(32) என்ற மனைவியும், ருக்ஷானா பேகம் என்ற மகளும் ரோஷன் அகமது என்ற மகனும் உள்ளனர்.

இதில் ருக்ஷானா பேகம் மைக்கேல் பட்டியில் உள்ள பள்ளியில் 10–ம் வகுப்பு படித்து வருகிறார். ரோஷன் அகமது செங்கிப்பட்டியில் 5–ம் வகுப்பு படிக்கிறார்.

ஈராக்கில் உள்நாட்டு போர் நடைபெற்று வருவதால் சலிம் அபுபக்கர் அங்குள்ள தனி அறையில் தங்க வைக்கப்பட்டுள்ளார். அவருடன் இந்தியாவை சேர்ந்த மேலும் 6 பேரும் தங்க வைக்கப்பட்டுள்ளனர்.

அவரது பாஸ்போர்ட் மற்றும் ஆவணங்களை அவரது கம்பெனி உரிமையாளர் எடுத்து விட்டு சென்று விட்டதால் அவர் இந்தியா திரும்ப முடியாமல் தவித்து வருகிறார்.

எனவே அவரது மனைவி மற்றும் குழந்தைகள், உறவினர்கள் கண்ணீருடன் உள்ளனர். அவரை மீட்டு இந்தியா அழைத்து வர நடவடிக்கை எடுக்க வேண்டும் என்று அவர்கள் கோரிக்கை விடுத்துள்ளனர்.

இன்று காலை சலிம் அபுபக்கர் தனது மனைவி மற்றும் குழந்தைகளுடன் போனில் பேசினார். அப்போது அவர் நான் நலமுடன் இருப்பதாகவும், விரைவில் நாடு திரும்பி விடுவதாகவும் தெரிவித்தார்.

ஆனாலும் அவரது உறவினர்கள் அவருக்கு பாதுகாப்பு இல்லை எனவும் விரைவில் நாடு திரும்ப நடவடிக்கை எடுக்க வேண்டும் என கூறி வருகிறார்கள். அவர் வருகையை குடும்பத்தினர் கண்ணீருடன் எதிர்பார்த்து உள்ளனர்.