திருவொற்றியூர் பஸ் நிலையம் அருகே உள்ள ஒரு அடுக்குமாடி குடியிருப்பில் வசிப்பவர் நாகராஜ்.(35) தொழில் அதிபர். சென்னை துறைமுகத்தில் ஏற்றுமதி இறக்குமதி நிறுவனம் நடத்தி வருகிறார்.
கடந்த 10 நாட்களுக்கு முன் இவர் காரில் அலுவலகம் சென்றார். காரை அவரது டிரைவர் சரவணன் ஓட்டினார்.
எண்ணூர் விரைவு சாலையில் உள்ள எல்லையம்மன் கோவில் அருகே கார் செல்லும் போது மோட்டார் சைக்கிளில் வந்த 6 பேர் காரை வழிமறித்தனர். கார் நின்றதும் அந்த கும்பல் டிரைவரை தாக்கி காரில் ஏறினர். பின்னர் தொழில் அதிபரை தாக்கி காருடன் கடத்தி சென்றனர். விச்சூர் பகுதியில் ஒரு இடத்தில் அவரை அடைத்து வைத்தனர்.
பின்னர் கடத்தல் கும்பல் நாகராஜ் வீட்டுக்கு டெலிபோன் செய்து, ‘‘ரூ.2 கோடி தந்தால்தான் விடுவிப்போம்’’ என்று நாகராஜ் மனைவியிடம் மிரட்டினர். இதுகுறித்து நாகராஜ் மனைவி ஜெனிபர் கடற்கரை போலீசில் புகார் செய்தார்.
பின்னர் கடத்தல் கும்பலிடம் ரூ.10 லட்சம் தருவதாக பேரம் பேசி சம்மதிக்க வைத்தார். பணத்தை வாங்க கடத்தல் கும்பலில் 2 பேர் டிரைவர் சரவணனை அழைத்துக் கொண்டு காரில் வந்தனர். எண்ணூர் துறைமுகம் அருகே கார் வந்த போது போலீசார் அவர்களை மடக்கி பிடித்தனர்.
டிரைவர் சரவணன் மீது போலீசாருக்கு சந்தேகம் ஏற்பட்டது. அவரிடம் விசாரணை நடத்தியதில் அவனது உதவியின் பேரில் ரவுடி கும்பல் நாகராஜனை கடத்தியது தெரிய வந்தது.
இதையொட்டி டிரைவர் சரவணன், ரவுடிகள் கிஷான், சரத் ஆகியோர் கைது செய்யப்பட்டனர். கடத்தப்பட்ட நாகராஜனும் மீட்கப்பட்டார். அவரிடம் இருந்து பறிக்கப்பட்ட 32 பவுன் நகை மீட்கப்பட்டது.
எண்ணூர் அன்னை சிவகாமி நகரை சேர்ந்த ரவுடி தன சேகரன் இந்த கடத்தலில் மூளையாக செயல்பட்டது தெரியவந்தது. அவன் தற்போது கடலூர் சிறையில் உள்ளார். கடத்தலில் ஈடுபட்ட மேலும் 3 பேரை போலீசார் தேடி வருகிறார்கள்.
0 comments
Post a Comment