தீவிரவாதிகளின் எழுச்சி தாக்கு பிடிக்குமா ஈராக்?

எப்போதுமே யுத்த பூமி! இதுதான் ஈராக்கின் அடையாளம்!

பல ஆண்டுகளாக போரிலேயே சிக்குண்டு சின்னாபின்னமான ஈராக் இப்போது தீவிரவாதிகள் பிடியில் சிக்கி இருக்கிறது. தீவிரவாதிகள் எந்த நேரத்திலும், முழு ஈராக்கையும் கபளிகரம் செய்யலாம் என்பதுதான் இப்போதைய நிலை.

ஈராக் இன்று மட்டும் அல்ல பல நூற்றாண்டுகளாகவே போர் மேகம் சூழ்ந்த நிலையில்தான் காலத்தை கடத்திச் சென்றுள்ளது.

மன்னர் ஆட்சியின் கீழ் இருந்த ஈராக் பகுதி பல அரபு மன்னர்கள் மற்றும் துருக்கி மன்னர்களின் பல்வேறு படையெடுப்புகளால் தொடர்ந்து பல போர்களை சந்தித்தது. கடைசியாக துருக்கியின் ஒட்டமான் மன்னர்களின் ஆட்சியின் கீழ் இருந்தது.

முதலாம் உலகப்போரில் ஜெர்மனிக்கு ஆதரவாக ஒட்டமான் மன்னர்கள் இருந்தனர். அந்த போரில் ஜெர்மனி தோற்றதையடுத்து ஈராக் பகுதியை இங்கிலாந்து கைப்பற்றியது

அதன்பின்னர் இங்கிலாந்து, ஈராக் என்ற பெயரில் நாட்டை உருவாக்கி அங்கு தனது ஆதரவாளரான பைசல் என்பவரை மன்னர் ஆக்கி ஆட்சியை நடத்தியது. 1932–ம் ஆண்டு இங்கிலாந்து ஈராக்கிற்கு சுதந்திரம் அளித்தது. அதன்பின்னரும் மன்னர் ஆட்சி நீடித்து வந்தது.

இடையில் பலமுறை மன்னராட்சி கவிழ்க்கப்பட்டது. அப்போது ஈராக்கில் உருவான பாத் கட்சி ஆட்சியை கைப்பற்றி அரசை உருவாக்கியது. அகமத் ஹசேன் ஈராக் அதிபராக இந்த கட்சியில் முக்கிய தலைவராக இருந்தவர் தான் சதாம்உசேன். 1979–ம் ஆண்டு திடீர் புரட்சியை நடத்திய சதாசம்உசேன் ஆட்சியை கைப்பற்றினார். அதன்பிறகு தொடர்ந்து அவரது ஆட்சியே நீடித்து வந்தது.

ஈராக் மொத்த மக்கள் தொகை 3 கோடியே 60 லட்சம். 97 சதவீதம் முஸ்லிம்கள். இதில் ஷியா பிரிவினர் 65 சதவீதமும் சன்னி முஸ்லிம்கள் 35 சதவீதமும் உள்ளனர்.

சதாம்உசேன் சன்னி இனத்தை சேர்ந்தவர். சிறுபான்மை இனத்தை சேர்ந்தவரான அவர் அதிபராக இருந்ததால் அது ஷியா பிரிவினருக்கு பிடிக்கவில்லை. எனவே இரு தரப்பினருக்கும் அடிக்கடி மோதல் நடந்து வந்தது.

ஆட்சி அதிகாரத்தில் இருந்த சதாம்உசேன் ஷியா முஸ்லிம்களை அடக்கி ஒடுக்கினார். அவருக்கு பயந்து பல ஷியா தலைவர்கள் நாட்டை விட்டே ஓடினார்கள். ஷியா பிரிவு மக்கள் அதிகமாக வசிக்கும் பக்கத்து நாடான ஈரான் மீது 1979–ம் ஆண்டு சதாம்உசேன் போர் தொடுத்தார். இந்த போர் 9 ஆண்டுகள் தொடர்ந்து நீடித்தது.

இதில் சதாம்உசேனுக்கே வெற்றி கிடைத்தது. இதனால் சதாம்உசேனின் செல்வாக்கு அரபு நாடுகளில் அதிகரித்தது. இதை பயன்படுத்திய சதாம்உசேன் பக்கத்து நாடுகளையும் மிரட்ட ஆரம்பித்தார்.

1990–ம் அண்டு திடீரென பக்கத்து நாடான குவைத்தை ஆக்கிரமித்தார். இதனால் அமெரிக்கா குவைத்துக்கு ஆதரவாக போரில் குதித்தது. குவைத்தில் இருந்த ஈராக் படைகள் விரட்டியடிக்கப்பட்டன.

அதன்பிறகும் சதாஉசேன் பக்கத்து நாடுகளையும் மிரட்டி வந்தார். இதனால் 2003–ம் அண்டு திடீரென அமெரிக்கா ஈராக் மீது படையெடுத்தது.

அமெரிக்கா படைகளின் தாக்குதலை சமாளிக்க முடியாமல் சதாஉசேன் தலைநகரை விட்டு தப்பி ஓடினார். அவரை அமெரிக்க படையினர் கைது செய்தனர். இதற்கிடையே ஈராக்கில் அமெரிக்கா பொம்மை அரசு ஒன்றை உருவாக்கியது. ஆட்சியாளர்களிடம் சதாம்உசேனை ஒப்படைத்தனர். 2006–ம் ஆண்டு டிசம்பர் மாதம் சதாம் உசேன் தூக்கில் போடப்பட்டார்.

ஈராக்கில் ஆட்சியில் இருந்தவர்களில் அதிபர், பிரதமர் உள்பட முக்கிய தலைவர்கள் அனைவரும் ஷியா பிரிவை சேர்ந்தவர்கள் அவர்கள் சன்னி முஸ்லிம்களை பழிவாங்கும் வகையிலேயே நடந்து கொண்டனர்.

இதனால் சன்னி முஸ்லிம்கள் ஆட்சியாளர்கள் மீது கோபத்தில் இருந்தனர். சன்னி முஸ்லிம் தீவிரவாத படைகளும் உருவானது. அவர்கள் அடிக்கடி வெடிகுண்டு தாக்குதல்களை நடத்தினார்கள்.

இதற்கிடையே 2011–ம் ஆண்டு ஈராக்கில் இருந்து அமெரிக்கா படைகள் முற்றிலும் வெளியேறின. நாட்டை பாதுகாக்கும் முழு பொறுப்பையும் ஈராக் படைகள் ஏற்றன.

இந்த நேரத்தில் சன்னி முஸ்லிம்கள் ஒன்று சேர்ந்து ஐ.எஸ்.ஐ.எஸ். என்ற பெயரில் தீவிரவாத படைகளை உருவாக்கி இருந்தனர். இந்த படை பக்கத்து நாடான சிரியாவில் செயல்பட்டு வந்தது.

3 ஆண்டுகளுக்கு முன்பு சிரியாவில் அதிபருக்கு எதிராக உள்நாட்டு போர் வெடித்தது. அதில் அரசு படைகளுக்கு எதிராக ஐ.எஸ்.ஐ.எஸ். தீவிரதிவாதிகள் தாக்குதல் நடத்தினார்கள். சிரியாவின் ஒரு பகுதியையும் ஈராக்கையும் சேர்ந்து இஸ்லாமிய தேசம் என்ற பெயரில் ஒரு நாட்டை உருவாக்குவது ஐ.எஸ்.ஐ.எஸ். தீவிரவாதிகளின் திட்டமாகும்.

இதற்காக சிரியாவில் அல்ராக் மற்றும் அதை சுற்றியுள்ள பகுதிகளை ஏற்கனவே தீவிரவாதிகள் கைப்பற்றி இருந்தனர். அதைத்தொடர்ந்து ஈராக்கையும் கைப்பற்றும் நோக்கில் கடந்த வாரம் திடீரென ஈராக்கில் தாக்குதல் நடத்தினார்கள். ஈராக்கின் 2–வது தலைநகரமான மொசூல் நகரை முதலில் அவர்கள் கைப்பற்றினார்கள்.

அதைத்தொடர்ந்து சதாம்உசேனின் சொந்த ஊரான திக்ரித், மற்றும் பலுஜா ஆகிய நகரையும் கைப்பற்றினார்கள். தற்போது தலைநகர் பாக்தாத்தை கைப்பற்றும் நோக்கத்துடன் முன்னேறி வருகிறார்கள். எந்த நேரத்திலும் பாக்தாத்தை தீவிரவாதிகள் கையில் விழலாம் என்று எதிர்பார்க்கப்படுகிறது.

தலைநகரைம் மற்ற முக்கிய நகரங்களையும் காப்பாற்றும் நோக்கத்துடன் அமெரிக்காவின் உதவியை ஈராக் நாடியுள்ளது. அமெரிக்கா தீவிரவாதிகள் மீது போர் தொடுத்தால் மட்டுமே ஈராக்கை காப்பாற்ற முடியும் என்ற நிலை ஏற்பட்டுள்ளது.

அமெரிக்கா தலையிட மறுத்துவிட்டால் ஈராக் முழுவதும் தீவிரவாதிகளின் பிடியில் சிக்குவது தவிர்க்க முடியாததாக ஆகி விடும். ஐ.எஸ்.ஐ.எஸ். தீவிரவாதிகளை எதிர்த்து போராட ஷியா முஸ்லிம் பிரிவனரும் தயாராகி வருகிறார்கள். எனவே ஈராக் முழுவதும் ரத்த ஆறு ஓடும் நிலை ஏற்பட்டுள்ளது.

ஈராக்கில் ஒரு பகுதியான குர்திஸ்சில் ஏற்கனவே சுயாட்சி கொண்ட அரசு செயல்பட்டு வருகிறது. ஈராக்கில் நடந்து வரும் தற்போதைய பிரச்சினையை அடுத்து அவர்கள் தனி நாடாக செயல்பட போவதாக அறிவித்து உள்ளனர்.

தீவிரவாதிகள் ஈராக்கை முற்றிலும் கைப்பற்றினால் குர்திஸ் தனிநாடாக மாறிவிடும். மேலும் ஈராக் பல நாடாக சிதறும் வாய்ப்பும் உள்ளது.