ஆந்த்ராக்ஸ் என்ற கொடிய உயிர்க்கொல்லி நோய் பேசில்லஸ் ஆந்த்ராசிஸ் என்ற பாக்டீரியாவின் தாக்கத்தினால் ஏற்படும் ஒரு தொற்று நோய் ஆகும். பொதுவாக ஆடுகள் போன்ற குளம்புகள் கொண்ட விலங்குகளுக்கு வரக்கூடியது என்ற போதிலும் இவற்றுடன் தொடர்பு கொண்ட மக்களுக்கும் இந்த நோய் பரவும் தன்மை கொண்டது.அமெரிக்காவின் அட்லாண்டா மாநிலத்தில் உள்ள அரசு ஆய்வகங்களில் பணிபுரியும் விஞ்ஞானிகளில் 75 பேர் தகுந்த பாதுகாப்பின்றி இத்தகைய பாக்டீரியாக்களைக் கையாண்டுள்ளதாக அமெரிக்க அரசு நேற்று தெரிவித்துள்ளது.
எனவே இந்த நோய்த்தொற்று பாதுகாப்பிற்காக அவர்களுக்கு மருத்துவ உதவி அளிக்கப்படும் என்று அங்குள்ள அரசு நோய் கட்டுப்பாடு மற்றும் தடுப்பு மையம் தெரிவித்துள்ளது.
உயர்மட்ட பாதுகாப்பு கொண்ட ஒரு ஆய்வகத்தில் பணிபுரியும் விஞ்ஞானிகள் தகுந்த பாதுகாப்பு நடவடிக்கைகளை மேற்கொள்ளாமல் இருந்துள்ளதால் இந்த சம்பவம் நடந்துள்ளதாக அரசு தகவல்கள் தெரிவிக்கின்றன. ஆய்வுக்குப்பின்னர் இந்த பாக்டீரியாக்களை அந்த விஞ்ஞானிகள் குறைந்தபட்ச பாதுகாப்பு கொண்ட ஆய்வகங்களுக்கு மாற்றியதாகவும் கூறப்படுகின்றது.
இந்த நிகழ்வு கடந்த 13-ம் தேதியன்று கண்டுபிடிக்கப்பட்டதாகவும் உடனடியாக இதில் பணிபுரிந்துவரும் அனைவரையும் தொடர்பு கொள்ளத் தொடங்கியதாகவும் சிடிசி சுற்றுச்சூழல் சுகாதார மற்றும் பாதுகாப்பு அலுவலகத்தின் இயக்குனர் டாக்டர் பால் மீசன் தெரிவித்தார்.
ஆனால் இதுவரை எந்த ஊழியரிடமும் ஆந்த்ராக்ஸ் நோய்க்கான அறிகுறிகள் இல்லை என்றும் அவர் கூறினார். எனினும், கிட்டத்தட்ட 75 விஞ்ஞானிகளுக்கு 60 நாட்களுக்குத் தேவையான தடுப்பு மருந்தும், ஊசியும் வழங்கப்பட இருப்பதாகவும் மீசன் குறிப்பிட்டார்.
0 comments
Post a Comment